Sentyabrın 2-də "Oazis" restoranında baş verən kütləvi
dava ilə bağlı istintaq "donub".
Axar.az-ın əldə etdiyi məlumatda iddia olunur ki, hadisədən 43
gün keçməsinə baxmayaraq, istintaqın gedişi haqda məlumat verilmir.
Tərəflər arasında barışıq əldə olunandan sonra cinayət işinin nə
yerdə olduğu açıqlanmır.
Qeyd edək ki, kütləvi davaya görə iki maddə üzrə cinayət işi
başlanmışdı. Binəqədi Rayon Polis İdarəsinin (RPİ) İstintaq
şöbəsində Cinayət Məcəlləsinin 221.2.1 (xuliqanlıq, bir qrup şəxs
tərəfindən törədildikdə) və 221.3-cü (xuliqanlıq, silah və ya silah
qismində istifadə edilən əşyaları tətbiq etməklə törədildikdə)
maddələri ilə istintaq aparılırdı.
Eyni zamanda ikisi restoranın əməkdaşı olmaqla - Camal Məmmədov,
Kənan Adıgözəlov və Ravid Abdullayev istintaqa cəlb olunmuşdu.
Lakin R.Abdullayev zaminə buraxıldı və o vaxtdan bu günə kimi
istintaqın gedişindən bir xəbər yoxdur.
Başı Şəhər Prokurorluğundan Axar.az-a bildirildi ki, iş Daxili
İşlər Nazirliyinə verilib. DİN-dən isə hadisənin Binəqədi Rayon
Polis İdarəsinin İstintaq Şöbəsində araşdırıldığı qeyd olundu.
Binəqədi RPİ-nin İstintaq şöbəsindən Mehman Ələsgərov da öz
növbəsində qeyd etdi ki, cinayət işi onlar tərəfindən araşdırılmır:
"İş bizdən alınıb".
Ancaq işin istintaq şöbəsindən alınıb hansı idarəyə verildiyi
bilinmir. Belə güman etmək olar ki, tərəflər arasında barışıq əldə
edildikdən sonra cinayət işi materialları tarixin ya arxivinə
qovuşub, ya da "Oazis cinayəti" qovluğu tozlu rəflərin birində
yerləşdirilib. Ancaq bu rəfin hansı polis idarəsində olduğu də
məlum deyil.
Yada salaq ki, sentyabrın 2-də "Oazis" restoranında müştərilərlə
restoranın işçiləri arasında kütləvi dava olub. Nəticədə 5 nəfər
müxtəlif dərəcəli bədən xəsarəti alıb.