Güclü külək nəticəsində Yasamalda yerləşən 225 nömrəli məktəbin damı uçub.

Axar.az xəbər verir ki, bu barədə məlumat Feysbuk sosial şəbəkəsində "Sancaq" səhifəsində yayılıb. Səhifə adminləri foto paylaşaraq məktəbin damının uçduğunu qeyd ediblər: "Güclü külək nəticəsində Yasamalda yerləşən 225 nömrəli məktəbin damı uçub yerə dağılıb. Orda oxuyan məktəblilər, müəllimlər, validenlər, sabah dərsə gedəndə çox diqqətli və ehtiyatlı olsunlar! O ərazidə yaşayan dostlarınıza da xəbər edin!"

Küləyin vurduğu daha bir ziyan isə "Gənclik" metrosu istiqamətindən Dövlət Tibb Universitetinə gedən yoldadır. Axar.az əməkdaşı xəbər verir ki, güclü külək yeni hörülən divarı dağıdıb və daşlar yola tökülüb. Hadisə nəticəsində qəza və ya xəsarət alan olmayıb.

Sabah da daxil olmaqla bir neçə gün davam edəcək küləkli hava şəraiti yağışla da müşayət olunacaq. Bölgələrdə isə hətta sulu qar və qar yağacağı deyilir.

Hidrometeroloq Gülşad Məmmədovanın sözlərinə görə, arabir güclənən cənub küləyi günün ikinci yarısında şimal-qərb küləyi ilə əvəz olunub: "Küləyin axşama doğru daha da şiddətlənəcəyi gözlənilir".