"Bu bir ailə dramı ola bilər, amma bunun nə dərəcədə doğru olub-olmadığını bilmirik. Həmçinin, qətli törədən tələbənin yaşının 18 olması ilə bağlı yayılan informasiyalar aydın deyil və böyük ehtimalla o yaşa çatmayıb".

Bunu Axar.az-a açıqlamasında Günel Nuriyevanın bacısı Pərvanə Nuriyeva tərəfindən qətlə yetirilməsinə KİV-in yanaşmasını şərh edərkən media eksperti Ələsgər Məmmədli deyib. Onun sözlərinə görə, bu məsələ bir daha jurnalistikanın peşəkarlıq probleminin dərinliyini göstərdi:

"Media yenə də bu tip məsələdə cinayətin şişirdilməsinə, şayiələrin informasiya kimi ötürülməsinə səbəb oldu: eyni zamanda, baş verən hadisə tam çözülmədən, hüquq-mühafizə orqanlarının rəsmi açıqlamaları olmadan çeşidli dedi-qodular qismində, müxtəlif formada təqdim edildi. Təqsirləndirilən şəxsin gerçək cinayətkar olub-olmadığı sübut edilmədən onu cinayətkar elan etməklə, mediamız qeyri-peşəkarlıq nümayiş etdirdi".

Ekspertin sözlərinə görə, media məsələyə şəxsi həyat prizmasından yanaşmalıydı:

"Öldürülmüş və ya cinayətə qurban getmiş birisinin şəxsiyyətinin bu şəkildə açıq verilməsi, atasının harada işləməsi və əlaqəsi olmayan informasiyaların bir-birinə bağlanması doğru deyil. Media buna şəxsi həyat prizmasından yanaşmalıydı".

Xatırladaq ki, oktyabrın 22-də Xətai rayonu, Xudu Məmmədov küçəsi 18 ünvanında yaşayan 20 yaşlı Günel Etibar qızı Nuriyevanın başı kəsilmiş meyiti tapılıb. Araşdırmalar zamanı G.Nuriyevanın bacısı Pərvanə Nuriyeva tərəfindən qətlə yetirildiyi müəyyən edilib.