Sabiq İqtisadi İnkişaf naziri Fərhad Əliyevin qardaşı, "Azpetrol" şirkətlər qrupunun keçmiş prezidenti Rafiq Əliyev ölkəni tərk edib.

Axar.az mötəbər qaynaqdan verilən məlumata görə, sabiq nazirin qardaşı həbsdən çıxandan bir müddət sonra Azərbaycandan gedib. Mənbənin sözlərinə görə, R.Əliyev Çexiyada məskunlaşıb və bu ölkədə biznes fəaliyyətini davam etdirir.

Xəbərə görə, keçmiş nazirin qardaşı Çexiyada həm öz biznesini, həm də Fərhad Əliyevin işini idarə edir: "Əliyev qardaşlarının həbsdən əvvəl Çexiyada biznesi olub. Fərhad Əliyev bu ölkəyə gedib-gəlsə də, qardaşı Rafiq Əliyev Çexiyada yaşayır".

Qeyd edək ki, 2005-ci ildə dövlət çevrilişinə cəhd ittihamı ilə həbs olunan Fərhad və Rafiq Əliyevlər sonradan iqtisadi cinayətlərdə də təqsirli bilinmişdilər. Məhkəmə əmlakları müsadirə olunmaqla Fərhad Əliyevi 10 il, Rafiq Əliyevi isə 9 il azadlıqdan məhrum etmişdi. Onlar Prezidentin sərəncamı ilə əfv olunublar.