Bakı Dövlət Sirki maşında kassa açıb.

Axar.az-ın əməkdaşı şahid olub ki, sirkin oktyabrın 31-dən başlayacaq "Fəvvarələr fantaziyası" adlı konsert proqramlarının biletləri "Jiquli" markalı avtomobilin içində satışa çıxarılıb.
Əməkdaşımız bildirir ki, metronun "Neftçilər" stansiyası qarşısında dayanan maşının qarşısına Bakı Dövlət Sirki yazılmış plakat vurulub, sağ pəncərəsinin şüşəsinə isə biletlərin qiymətləri elan kimi yazılıb.

Hazırda sıra 3-dən 7-ə qədər olan yerlərdən bilet 15 manatdır, 8-11-ci sıralarda biletlər 10 manata satılır, 12-17-cı sıralarda isə 8 manata bilet əldə etmək olar. Maşının içində oturan şəxsə yaxınlaşan vətəndaşlar biletlərlə maraqlanırlar, kimisi alır, kimisi biletin bahalığından şikayətlənir.