Ana səhifə Toplum |
Millət vəkili Qənirə Paşayeva Müdafiə Nazirliyi, Mədəniyyət Mərkəzi və "Şəhid övladları və kimsəsiz uşaqlara yardım" İB-nin təskilatçılığı ilə şəhid pilot, mayor Təbriz Musazadəyə həsr olunmuş tədbirdə iştirak edib.
Axar.az xəbər verir ki, tədbirdə şəhid anaları , qazilər, millət vəkilləri , şəhid T.Musazadənin ailə üzvləri, iş yoldaşları , ictimaiyyət nümayəndələri iştirak edib. Millət vəkili tədbirdə çıxış edərək T.Musazadənin qəhrəmanlıq yolundan danışıb və gənclərə çağırış edib.
Q.Paşayeva bu cür tədbirin keçirilməsinin vacibliyini vurğulayıb:
"Nə qədər ki, Azərbaycan xalqı var, qəhrəman şəhidlərimizin əziz xatirəsi heç vaxt unudulmayacaq. Belə qəhrəman oğulları böyüdən sizin kimi ata-anaların qarşısında baş əyirik. T.Musazadənin ömür yolu bugünkü gənclərə əsl örnəkdir".
Millət vəkili televiziyalara çağırış edərək qəhrəman şəhidlərimiz haqqında hazırlanan filmlərin tez-tez nümayiş olunmasının önəmindən bəhs edib: "Torpaqlarımızın 20 faizi hələ də düşmən işğalı altındadır və gənclərimizin vətənpərvərlik ruhunda yetişməsi üçün Təbriz Musazadə kimi qəhrəmanların həyat yolundan gənclərimiz örnək almalıdır. Böyüyən gənclərimizin bu qəhrəmanlarımızı tanıması üçün ziyalılarımız, müəllimlərmiz, hər birimiz fəal olmalıyıq. Şəhidlərimiz haqqında çəkilən bu cür filmlər orta məktəblərdə uşaqlarımıza, gəncliyimizə nümayiş olunmalıdır.
Dövlətimiz və xalqımız hər zaman yanınızdadır. Biz hamımız Ali Baş Komandan Prezident İlham Əliyevin rəhbərliyi altında torpaqlarımızın işğaldan azad olunacağına və bütün şəhidlərimizin ruhunun sakitlik tapacağına əminik. O gün uzaqda deyil. İnşallah torpaqlarımızı işğaldan azad edəcəyik və şəhidlərimizin də ruhu şad olacaq".
Q.Paşayeva Birinci vitse-prezidenti Mehriban Əliyevanın Aprel şəhidlərimizin ailələri ilə görüşündə şəhid ailələrinə hər bir azərbaycanlının diqqət və qayğı ilə yanaşması haqqında söylədiklərini xatırladıb və dövlətin şəhid ailələrinə dəstək olduğunu bildirib:
"Hər zaman sizin yanınızdayıq. Siz bütün Azərbaycan üçün çox dəyərlisiniz. Qəhrəman şəhidlərimizin qarşısında baş əyirəm. Bizim üçün müstəqil Azərbaycandan dəyərli heç bir şey ola bilməz".
Tədbir çərçivəsində millət vəkili şəhid ailələri ilə görüşərək söhbətləşib.
Tarix
2019.08.21 / 21:58
|
Müəllif
Büllurə Yunus
|