Sürücülər Bakıdakı tunellərdə havalandırma sistemlərinin olmadığını, yaxud olduqca zəif işlədiyini iddia edilər.

Xəzər TV-nin məlumatına görə, sürücülər iddia edir ki, tıxac zamanı vəziyyət daha da çətinləşir. Yüzlərlə avtomobil işlək vəziyyətdə tuneldə dayanır və onların buraxdığı tüstü, qaz nəfəs almanı çətinləşdirir, insanlara pis təsir edir.

Bu iddialar tunellərdəki havalandırma sisteminin mövcud vəziyyətini gündəmə gətirir.

İddialara münasibət bildirən Azərbaycan Avtomobil Yolları Dövlət Agentliyinin Mətbuat katibi Anar Nəcəfli deyib ki, Bakıdakı bütün tunellərdə havalandırma sistemi var və onlar işlək vəziyyətdirlər. Quraşdırılmış ventilyatorların funksiyası zəhərli qazı sovuraraq bayıra buraxmaqdır. Buna görə tunellərin üzərində çıxıntılar var.

Tıxacda avtomobillərin buraxdığı qazın sürücü və sərnişinlərə daha çox təsir etməsi məsələsinə gəlincə, Anar Nəcəfli qeyd edib ki, bu normal haldır. Çünki tunel qapalı tipli məkan hesab edilir.