18:57

Dahi şair Nəsiminin 650 illik yubileyi ilə əlaqədar bir gündə 650 min ağacın əkilməsi təşəbbüsü azərbaycanlılar arasında həmrəyliyin nümayişi idi. Hədəf 650 min ağac əkmək idi. Amma bizə daxil olan məlumatlara görə, əkilən ağacların sayı 650 mini keçib. Bu da sevindirici haldır.

Axar.az xəbər verir ki, bunu Ekologiya və Təbii Sərvətlər nazirinin müavini Firdovsi Əliyev bu gün keçirdiyi mətbuat konfransında deyib.

Nazir müavininin sözlərinə görə, bu gün SOCAR əməkdaşları hətta 100 min ağac əkib. 12 min ağac əkilmək üçün Çilov adasına göndərilib.

F.Əliyev əlavə edib ki, bir gündə 650 min ağacın əkilməsi həm bugünkü, həm də gələcək nəsillərə xidmət edən təşəbbüsdür: "Regionlara paylanılan ağac tingləri iqlim şəraitinə görə seçilmişdi. Yəni ağac əkilməsi xatirinə seçim olmadı. Əsas odur ki həmin ağaclara diqqət və qayğı daimi olsun".

Qeyd edək ki, bir gündə 650 min ağacın əkilməsi ölkəmizdə yaşıllıqların daha da artırılmasına, qlobal iqlim dəyişikliyinin təsirlərinin azaldılmasına, həm də karbon qazının udulmasına müsbət təsir göstərəcək.

***

Bu gün əkilən 650 min ağacın mühafizəsi, bitiş faizinin yüksək olması və aqrotexniki qulluq göstərilməsi üçün müntəzəm olaraq Ekologiya və Təbii Sərvətlər Nazirliyi yanında İctimai Şura tərəfindən monitorinqlər keçiriləcək. Monitorinqlərin nəticələri barədə ictimaiyyət vaxtaşırı məlumatlandırılacaq.

Bu barədə Ekologiya və Təbii Sərvətlər Nazirliyi yanında İctimai Şuranın sədri Mələk Şükürova dekabrın 6-da keçirilən mətbuat konfransında məlumat verib.

"Ağac əkilmiş ərazilərə müntəzəm olaraq ictimai nəzarət olunmalıdır. Biz də bu təşəbbüsə dəstək olmağa və ictimai nəzarəti həyata keçirməyə hazırıq. Ağac əkilmiş sahələrdə yüksək bitiş faizinin əldə olunması, qulluq göstərilməsi və mühafizəsi məqsədilə 650 min ağacın əkildiyi və nazirlik tərəfindən xəritəsi hazırlanmış ərazilər xəritəyə uyğun olaraq nəzarətdə saxlanılacaq", - deyə M.Şükürova qeyd edib.

M.Şükürova əkilən 650 min ağacın 10 ildən sonra atmosferdəki karbon emissiyasını 45 min 500 ton azaldacağını diqqətə çatdırıb. Bildirib ki, bu da qlobal iqlim dəyişikliyinə verilən töhfə olacaq.