Bir müddət əvvəl yaydığı videoda atasını Suriyaya dəvət edən azərbaycanlı İŞİD-çinin ("İslam dövləti" terrorçu qruplaşması) bu ölkədə gedən döyüşlərdə həlak olması barədə məlumat yayılıb.

Oxu.az-a daxil olan məlumatda bildirilir ki, əsl adı Dostəliyev Fariz Çingiz oğlu olan həmin şəxs Qaradağ rayonu Səngəçal qəsəbə sakinidir.

Məlumatda bildirilir ki, Fariz dünən, yəni fevralın 10-da gedən döyüşlərdə öldürülüb.

Mənbənin bildirdiyinə görə, İŞİD-ə qoşulmaq üçün bu ölkəyə gələn şəxslərdən onların telefonları alınır və döyüşlərdə öldürüldükləri təqdirdə, həmin telefondan ölən şəxsin ailəsinə bu barədə SMS-məlumat göndərilir və belə bir məlumat Farizin də ailəsinə daxil olub.

Farizin əmisi Elxanın sözlərinə görə, qəsəbədə gəncin ölümü barədə məlumatlar yayılsa da, bu, hələ dəqiq deyil:

"Belə söz var. Lakin hələ dəqiq bilinmir".

Onun sözlərinə görə, Fariz beş aydır ki, İŞİD-ə qoşulmaq üçün əvvəl Türkiyəyə, oradan isə Suriyaya keçib.

Elxan Dostəliyev həmçinin ailəsinin Farizin bu hərəkətini qəti şəkildə pislədiyini və onun İŞİD-ə qoşulmasının əleyhinə olduğunu da bildirib.

Qeyd edək ki, bir müddət əvvəl Suriyada döyüşən azərbaycanlı İŞİD-çi atasına çağırış edərək, onu bu ölkəyə gəlməyə dəvət etmişdi.