"Gələn həftə onların nümayəndələri ilə görüşəcəyik".

Bu sözləri Axar.az-a açıqlamasında Milli Məclisin Sosial siyasət komitəsinin sədr müavini Musa Urud parlamentin qarşısında toplanan Qarabağ veteranları ilə görüş barədə məlumat verərəkən dedi. Onun sözlərinə görə, problem araşdırılır:

"Milli Məclisin qarşısında toplaşanlar şəhid ailələri idi. Onlar dövlət icbari sığorta ilə bağlı məsələ qaldırmışdılar. Biz onlarla görüşdük. Gələn həftə onların nümayəndələri ilə görüşməyi planlaşdırırıq. Görüşdə hər şeyi ətraflı müzakirə edəcəyik ki, problem nədir və nədən qaynaqlanır. Məsələ həll olunacaq".

Xatırladaq ki, bu gün günorta saatlarında 100-dək Qarabağ müharibəsi veteranı və şəhid ailəsi üzvləri 23 ildir sığorta pulunu ala bilmədikləri üçün Milli Məclisin qarşısına toplaşıb.

ANS-in məlumatına görə, aksiyaçılar deyiblər ki, 1992-1994-cü illərdə gedən hərbi əməliyyatlar zamanı həlak olan şəxslərin ailə üzvləri dövlət icbari sığorta pulunu ala bilmirlər. Etirazçılardan bəziləri 10-cu dəfədir buraya gəldiklərini, ancaq problemin hələ də həllini tapmadığını söyləyib. Onlar Ağdamdan və Gəncədən bəzi şikayətçilərin maşınlarının Qaradağ rayonu ərazisində saxlanıb geri qaytarıldığını iddia ediblər.

Parlamentin Sosial siyasət komitəsinin üzvləri Hadı Rəcəbli və Musa Quliyev etirazçılarılarla görüşüblər və onların nümayəndələri ilə parlamentin binasında söhbətləşib, problemin araşdırılmasına başlayıblar.