Bakıda ifşa edilən dini ekstremist cinayətkar dəstənin öldürdüyü iş adamı barəsində məlumatlar var.

Axar.az yada salır verir ki, ötən il noyabrın 24-də yaşadığı evdə odlu silahla qətlə yetirilmiş Qəbələ sakini Vahid Vahabov "Soyuq bulaq" restoranının sahibi olub. Mərhum hadisə vaxtı evdə həyat yoldaşı ilə birgə imiş. O, gecəyarısı evinə soxulan şəxslərin səsinə oyanıb. Oyanması ilə güllələnməyi bir neçə saniyə çəkib. Cinayətkarlar onu heç yatağından qalxmağa imkan verməyərək güllələyiblər.

O, hadisədən bir neçə gün əvvəl "Toyota Prado" markalı avtomobilini satıb. Görünür, cinayətkarlar onun evində pulun olduğunu biliblər. Lakin pulları aparmağa müvəffəq olmayıblar.

Ehtimal edilir ki, V.Vahabov ölümündən bir neçə gün əvvəl "Globeks" ve "Baku hotel company" mehmanxanaları üçün lisenziya alıb. Onun bu uğuru rəqibləri üçün xoş olmayan hal ola bilər. Digər xəbərə görə, Vahid yaxın tanışları ilə yeyib-içərkən cəmi bir ay ömrü qaldığını deyib. Bu, onun kimlərsə tərəfindən ölümlə təhdid olunmasına işarədir.

Xatırladaq ki, daxili işlər və prokurorluq orqanları bir sıra ağır və xüsusilə ağır cinayətlər törətməkdə şübhəli bilinən mütəşəkkil cinayətkar dəstəni ifşa edib. Araşdırmalarla müəyyən edilib ki, Vahid Vahabovun qonşusu Coşqun Kərimbəyli onun imkanlı şəxs olduğu barədə yaxın dostları, radikal ekstremist yönümlü dini təriqət üzvləri olan əvvəllər məhkum edilmiş Nurəddin Xəlilova, Müşfiq Mikayılova, Rəşad Həşimliyə və Əhməd Kərimova məlumat verib. Onlar Vahid Vahabovun yaşadığı evə basqın edərək külli miqdarda pul və qızıl-zinət əşyaları ələ keçirmək barədə qabaqcadan razılığa gəliblər. Saxlanılan şəxslərin ətrafında həyata keçirilən əməliyyat tədbirləri və istintaq hərəkətləri nəticəsində dəstə üzvlərinin ötən il martın 18-də və iyulun 18-də Bakı şəhər sakinləri Gündüz Cəfərovun və Məcnun Dünyamalıyevin evlərinə quldurluq yolu ilə basqın edərək ümumilikdə 6400 manat pul, xeyli miqdarda qızıl-zinət və və məişət əşyaları aparmaları, avqustun 18-də Xəyal Əhmədova və Hilal Bicanova bıçaqla ağır xəsarət yetirmələri, cari il yanvarın 31-də və fevralın 14-də Sumqayıt şəhər sakinləri Bayram Əliyevə və Tahir Cəbrayılzadəyə məxsus məxsus VAZ-2106 markalı avtomobilləri qaçırmaları, fevralın 16-da isə Ağdaş şəhərində yaşayan Niyazi Əzizovun mənzilindən qızıl, geyim və məişət əşyaları, habelə, 1 ov tüfəngi oğurlamaları müəyyən edilib.