Azərbaycanda olma müddəti bitən bütün əcnəbilərin müraciətləri 30 aprel tarixinə kimi qəbul olunmuş sayılır. Bunun üçün elektron qaydada müraciət etməyə və ya qurumun qəbul şöbələrinə gəlməyə ehtiyac yoxdur.

Axar.az xəbər verir ki, bu barədə məlumatı Dövlət Miqrasiya Xidmətinin mətbuat katibi Elnur Kələntərov sosial şəbəkə hesabında yayıb.

E.Kələntərov bildirib ki, ölkədə olma müddəti bitən şəxslər narahat olmaya bilərlər. Çünki artıq onların müraciətləri qəbul olunub:

“Sadəcə, elektron qaydada və ya ödəniş terminalı vasitəsilə dövlət rüsumunu ödəməklə müvafiq icazə qərarlarını əldə etmək mümkündür. Bunun üçün Dövlət Miqrasiya Xidmətinin saytında ölkədə qalma müddəti bitən əcnəbilərin kodları yerləşdiriləcək. Həmin kodları əldə etməklə ödəniş terminallarında ödəniş edə biləcəklər”.

DMX sözçüsü bildirib ki, Dövlət Rüsumu haqqında Qanuna əsasən, 30 gün üçün yetkinlik yaşına çatmayan şəxslərə dövlət rüsumunun miqdarı 15 manat, yetkinlik yaşına çatan şəxslərə isə 30 manatdır. 60 gün üçün isə yetkinlik yaşına çatmayanlara 30 manat, yetkinlik yaşına çatan şəxslərə isə 60 manatdır.