Yumşaldmalar mərhələli şəkildə həyata keçirilsə, yollarda dəhşətli tıxacların müşahidə ediləcəyini hesab etmirəm. Ancaq aydın məsələdir ki, bu qadağalar birdən aradan qaldırılsa, işi olan da, olmayan da küçəyə, şəhərə axışacaq və bu da dəhşətli tıxaclara səbəb olacaq.

Bu sözləri Axar.az-a Baş Dövlət Yol Polisinin İctimaiyyətlə əlaqələr şöbəsinin müdiri, polis polkovniki Kamran Əliyev karantindən sonrakı dövrdə yollarda müşahidə olunacaq duruma aydınlıq gətirərkən deyib.

K.Əliyev bildirib ki, sürücülər də, vətəndaşlar da yolarda dəhşətli sıxlıq və tıxacın yaranmasını istəmirlərsə, yumşaldılmalar başlar-başlamaz şəhərə çıxmamalıdır:

“Bu günlər ərzində hərəkət iştirakçılarından daha çox sürücülər evdə olduğundan yollarda adi günlərlə müqayisədə nisbətən boşluq yaşanır. Anlaşılandır ki, uzun müddətdir evdə olmaq hamını darıxdırır. Karantindən dərhal sonra qohum, qonaq ziyarətləri təşkil edilsə, təbii ki, yollarda sıxlıq da yaranacaq. Yumşaldılmalar mərhələli şəkildə aparılsa və vətəndaşlar daha duyarlı olsa, hesab edirəm ki, yollardakı vəziyyət də yaxşı olacaq”.