Heydər Əliyev Fondunun vitse-prezidenti, İDEA İctimai Birliyinin təsisçisi və rəhbəri Leyla xanım Əliyevanın təşəbbüsü ilə keçirilən "Ümumrespublika Yaşıllaşdırma" marafonuna qoşulan Lənkəran rayonunda ötən il 10 mindən çox ağac əkilib.

Axar.az-a Lənkəran Rayon İcra Hakimiyyətindən verilən məlumata görə, İDEA İctimai Birliyinin yaz mövsümü ilə əlaqədar keçirilən "Ümumrespublika Yaşıllaşdırma" marafonunun ikinci mərhələsində daha 35 min ağac əkilməsi nəzərdə tutulur.

Aksiyada İcra Aparatının işçiləri, rayonun idarə, müəssisə və təşkilatlarının, təhsil, səhiyyə və mədəniyyət müəssisələrinin əmək kollektivləri və ictimaiyyət nümayəndələri fəal iştirak edirlər.

Hazırda Lənkəran Şəhər İcra Hakimiyyətinin başçısı Taleh Qaraşovun 20 fevral 2015-ci il tarixli sərəncamı ilə Lənkəranda "Yaşıllaşdırma aylığı" kampaniyası da mütəşəkkil davam edir. Aylıq çərçivəsində dəmirağacı, palıd, sərv, eldar şamı, çinar, palma, akasiya və s. ağac növlərinin əkilməsi nəzərdə tutulub.