4-5 il əvvəlki müsahibələrini oxuyanda özündənrazı, heç kimi bəyənməyən, laqeyd adam portreti cızılırdı beynimdə. Görüşümüz ya mənim, ya da onun hansısa başqa işi, problemi üzündən heç cürə təyin etdiyimiz vaxta alınmırdı deyə, düzü, müsahibənin alınacağına tərəddüd edirdim bir az, amma bütün iş-güc, əskiklərə rəğmən, alındı, məncə.

Ramil bəyin orada yerləşən bir restoranda çəkilişləri vardı deyə, "Zabitlər bağı"nda yerləşən həmin restoranda görüşdük. Yarım saat vaxtı vardı müsahibə üçün, diktofonu söndürəndə 29:04 saniyəni göstərirdi. İlk dəqiqələrdən müsahibələrindən haqqında yaranan fikir alt-üst oldu beynimdə, bir az sonra özünün də dediyi kimi, kitablar, ətrafdakı insanlar, əhatəsi ona çox böyük təsir göstərib. Dəyişib müsbətə doğru inkişaf etməyində çox böyük yardımçı olub. 5 il əvvəlki Ramildən əsər-əlamət qalmayıb, onun yerini daha ciddi işlərə can atan, ucuz şöhrət arxasınca qaçmayan olğun rejissor alıb.

Axar.az "Arzuların ardınca" filminin rejissoru Ramil Ağasıyevlə müsahibəni təqdim edir.

- Özünüz haqqında qısa məlumat verin, zəhmət olmasa.

- Bakı şəhərində anadan olmuşam, ADMİU-nu bitirmişəm, əlavə olaraq da Rüstəm İbrahimbəyovun təşkil etdiyi Kino Məktəbini bitirmişəm.

- İndiyə qədər neçə film (sənədli, bədii, qısametrajlı və ya tammetrajlı) çəkmisiniz?

- Vallah sayını bilmirəm, amma çəkmişəm. Tammetrajlı ilk filmimdir. İllər əvvəl Qaraqanın bir əsərinə film çəkmək istəyirdim, tilsimli bir şey oldu, heç cür alınmadı. Baş rolda çəkiləcək aktrisanın gah ayağı sındı, gah əli sındı, buna görə də filmi saxladıq.

- Qara qüvvələr də demişkən, bizim müsahibə də uzun müddətdir alınmırdı. Əvvəlki müsahibələrinizdə demisiz ki, sizin Allahınız başqalarının Allahından fərqlənir. Dini inancınız maraqlıdır.

- Hərənin anlayışında Allah bir cürədir. Kimsə onu göydə görür, kimsə xaçda, mənsə onu özümdə görürəm. Özümdə deyəndə, özümün bir hissəsi sayıram, məsələn bədənimdə axan qan, dırnaqdı, saçdı, dəridi - bunlar hamısı Allahdı, çünki məni yaradan odur. Dinlər də kütləni idarə eləmək üçün vasitədir. Heç bir dinə sitayiş eləmirəm.

- Rüstəm İbrahimbəyovun Kino Məktəbi ADMİU-dan fərqli olaraq sizə nəyi verdi?

- Təhsil, savad, bilik... İncəsənət Universitetində indiyəcən heç kimə deyilməyən bir şey. İndi də düşünürəm ki, İncəsənət Universiteti heç kimə heç nə vermir. Boş bir binadır ki, ildə kütləvi şəkildə rejissor istehsal edir.

- Hamı kimi olmaq istəmədiyinizə görə rejissor olmusunuz, yoxsa yaşamaq istəyib yaşaya bilmədiklərizi çəkmək üçün?

- Vallah yox, bu genetikdir. Atam da gənclikdə - o vaxtlar xalq teatrları olub - teatrlardan birinin rejissoru olub. Yəqin ki, ondan keçmə bir şeydir.

- Rəqslə indi də məşğul olursunuz?

- Yox, çoxdan məşğul olmuram.

- Ümumiyyətlə, rəqsə marağınız haradan yaranmışdı?

- 9-da oxuyanda sinifdə saxlamışdılar məni, sinifdə qalmışdım. Depressiyaya düşmüşdüm, düşündüm ki, nəsə yeni bir şey eləmək lazımdı. Yenilik axtarırdım, qarşıma rəqs çıxdı. RNB janrında, "Şou Balet Spider" qrupu vardı, orda oynamışam. Ondan sonra başqa yeniliklər axtardığıma görə rəqsdən uzaqlaşdım.

- 4-5 il bundan əvvəlki müsahibənizdə 100 000 manat pulunuz olsaydı, qırmızı "Ferrari" almaq istədiyinizi demisiniz, indi də "Ferrari" istəyərsiniz, yoxsa o arzunu başqası əvəzləyib?

- Yox, hələ də istəyirəm.

- Hələ də qırmızı "Ferrari"də ölmək istəyirsiniz?

- Yox, belə ölmək istəmirəm artıq. Planlar bir az dəyişib. Yaş ötdükcə, arzular, istəklər də dəyişir, amma qırmızı "Ferrari" hələ də istəyirəm.

- Sənət filmi, yoxsa kommersiya filmi? Hansı sizin profilinizə daha uyğundur?

- Vallah heç vaxt kommersiya filmi çəkməyi düşünməmişəm. Bu filmi də çəkəndə düşünmürdüm ki, haçansa filmi sata bilərəm. Bilmirəm, yalan deyərəm, amma bu filmdən sonra çoxlu kommersiya filmi təklifi gəlir.

- Hazırda bizdə çəkilən filmlərinin əksəriyyəti kommersiya filmidir, buna münasibətiniz?

- Yaxşıdır, çəkilsin. 100 filmdən bir film çıxacaq ortaya. Bu tendensiya yaradır, film istehsalı tendensiyası, yəni insanlar artıq filmlərə gedirlər, yaxşı filmi pis filmdən ayıra bilirlər. Bu, vacib bir şeydir.

- Filminiz kütlə üçün nəzərdə tutulub, yoxsa festivallara filan göndərilməkçün?

- Vallah, ilk filmdir, bilmirəm kütlə üçün çəkmişəm, yoxsa festivallar üçün. Sadəcə, öz istəyim vardı, bir film çəkmək istəyirdim və çəkdim.

- Yaxşı film çəkmək üçün nə lazımdır? Pul, yaxşı komanda, yoxsa istedad?

- İlk növbədə komanda, filmi komanda çəkir.

- Komandanızı özünüz illərlə yığmısız, yoxsa elə bu film üçün toplamısınız?

- Qərar verdim ki, film çəkim, ətrafımda insanlar vardı ki, heç vaxt birgə işləməmişdik. Komandamız birdən formalaşdı, ssenarini göndərdim oxudular, hamı qol qoydu ki, çəkək.

- İndiyə qədər hansısa beynəlxalq müsabiqədə iştirak etmisiz? Hansısa mükafatınız var?

- Yox, yoxdur.

- 22 min manata çəkilən film ("Arzuların ardınca" filminin büdcəsi 22 min manatdır – red.) "Oskar", "Kann" qazana bilərmi?

- Filmin uğuru büdcəsindən asılı deyil, filmin ideyasından çox şey asılıdır, məncə. "Kann", "Oskar" alan çox az büdcəli filmlər də var.

- İlk filminizi üzüağlıqla tamaşaçı qarşısına çıxarmağa hazırsınız?

- Düşünürəm ki, pis film deyil, amma ola bilər ki, pis film də olsun (gülür). Film haqqında mən rəy söyləyə bilmərəm, çünki bunu mən çəkmişəm.

- Baxmaq istədiyiniz filmləri çəkirsiz, yoxsa kütlənizin baxmaq istədiyi filmləri? Ya da fikirlər elə üst-üstə düşür?

- Vallah, yenə də deyirəm, bu filmi çəkəndə düşünmürdüm ki, bunu kütlə üçün, ya özüm istəyirəm deyə çəkirəm, sadəcə, belə bir ideya gəldi ağlıma ki, belə bir film çəkim və çəkdim.

- Axırıncı dəfə hansı filmə baxmısınız?

- Sonuncu baxdığım yerli film "Xoxan" olub, xarici isə - ispan rejissorun çəkdiyi "Sirr onun gözündədir " filminə baxmışam. Filmin yaxşısı, pisi olmaz, kult filmləri sevirəm.

- Xarici rejissorlardan daha çox hansını bəyənirsiz?

- Məni Kventin Tarantinoya bənzədirlər, adətən. Elə onu çox bəyənirəm.

- Axırıncı dəfə teatrda nə vaxt olmusuz?

- Teatrda çoxdandı olmuram.

- Axırıncı oxuduğunuz kitab?

- Cəlil Məmmədquluzadənin "Ölüləri"ni təkrar oxumuşam, Qaraqanın kitabını da oxumuşam, ondan qabaq Xalid Hüseynin romanını, ondan daha əvvəl də iranlı qadın yazarın – adını unutmuşam - "Mənim taleyim" kitabını oxumuşam.

- Müasir yerli yazarlardan hansını tanıyırsız?

- Heç biri ilə şəxsi tanışlığım yoxdur, Cəlil Cavanşir var, onu tanıyıram.

- Gənc həmkarlarınızdan hansının işini daha çox bəyənirsiniz?

- Ortada hələ bir işi olan yoxdur, məsələn mənim ADMİU-da bir tanışım vardı, Elvin Abdullayev, indi çox aktivdi o, filmlər işləyir, çəkir, yaxşı haldır bu. Gənclər çəkməli inkişaf etməlidir.

- Ölkəmizdə çəkilən və daha ciddi iş hesab edilən (sırf xarici festivallar üçün nəzərdə tutulmuş filmlər) "Nabat", "Axınla aşağı" filmlərini bəyəndiniz?

- Hər ikisinə baxmışam və hər ikisini çox bəyənmişəm.

- Film çəkmək asandı, yoxsa film kimi yaşamaq?

- Film kimi yaşamaq olmur axı, bir az gülməli səslənir bu; film kimi yaşamaq...

- Yaxşı film çəkməkçün çox oxumaq lazımdı, yoxsa çox görmək (gəzmək)?

- İki ölkədə (Türkiyə, Gürcüstan) olmuşam. Dostum Cavid Təvəkkül deyir ki, gündə 3 vərəq oxumaq, 1 vərəq yazmaq və 1 kinoya baxmaq lazımdır. Cavid Təvəkküldən çox şey öyrənmişəm, ona "müəllim" deyə bilərəm. Fikirlərimin formalaşmasında Cavidin çox böyük rolu var.

- Arzularınızın neçə faizinə çatmısız?

- İndiyə kimi nə arzum olubsa hələ ki, hamısını həyata keçirmişəm, bircə "Ferrari" qalıb. Arzular qurtarsa həyat da bitər.

- Siyasi fikirləriniz maraqlıdı, incəsənət adamının ictimai fikri olmalıdır, yoxsa ümumiyyətlə siyasətə qarışmamalıdır?

- Mənə elə gəlir ki, heç kim heç kimin işinə qarışmamalıdır, hərənin bir cür yanaşması var də, siyasətçi siyasətlə məşğul olmalı, rejissor filmini çəkməlidir.

- Ölkəmizdə hazırda müasir filmin vəziyyəti? Sizcə, məs, "Oskar"a neçə illik vaxtımız var?

- Niyə biz əsas kriteriya "Oskar"ı götürürük ki?! Bollivud film istehsal edir, heç "Oskar" marağında da deyil. Biz bir az başqa ölkəyik, məsələn, İran film çəkir, heç vaxt Hollivud haqqında düşünmür. Biz Hollivuda uyğun film çəkmirik hələ ki. Necə yaşayırıqsa, elə filmlər çəkməliyik. Bu dəqiqə bayırda atışma olan film çəksək, tamaşaçı baxıb güləcək, çünki bizdə bayırda hazırda heç kim heç kimi güllələmir.

- Dünyaya çıxmaq üçün filmlərdə mütləq dünyəvi mövzular işlənməlidir?

- Dünyaya çıxmaq üçün mütləq deyil ki, bəşəri mövzu olsun, məişət mövzusu da ola bilər. Filmi ona görə çəkirsən ki, sən nə çəkirsənsə tamaşaçılar da onu görsünlər (mən belə fikirləşirəm). Sənin düşündüyünü görsünlər.

- Rejissor gözü ilə baxsaz Azərbaycanda "ən yaxşı aktyor" nominasiyasına kimi layiq görmək olar?

- Qurban İsmayılov və Rasim Cəfəri – ağlıma gələn bunlar oldu.

Qeyd edək ki, Ramil Ağasıyevin ilk tammetrajlı filmi olan "Arzuların ardınca" filminin premyerası mayın 14-də keçiriləcək.