Mədəniyyət komitəsinin sədri Qənirə Paşayeva Milli Məclisin bugünkü iclasında çıxış edərək, müzəffər Ordumuza mənəvi dəstək üçün bir neçə təklif irəli sürüb.

Axar.az xəbər verir ki, millət vəkili həmkarlarını öz maaşlarını Azərbaycan Silahlı Qüvvələrinə Yardım Fonduna köçürməyi təklif edib, həmçinin onları qanvermə aksiyasına qoşulmağa dəvət edib.

Dövlətimizin gərəkən ehtiyatlara, o cümlədən yetərli qan bankına malik olduğunu, bunun rəsmi şəkildə bildirildiyini xatırladan millət vəkili öncəbhədə qızğın döyüşlər getdiyini və bu aksiyanın ehtiyacdan daha çox, mənəvi dəstək ifadəsi olacağına, örnək təşkil edəcəyinə diqqət çəkib.

Qənirə Paşayeva ali məktəblərdə hərbi dərslərin bərpasını, orta məktəblərdə isə daha yaxşı təşkili məsələsinə baxılmasını zəruri hesab etdiyini bildirib.

Çıxışında Səfərbərlik və Hərbi Çağırış üzrə Dövlət Xidmətinin yaranmasının 10 illiyi ilə bağlı yubiley medalının təsis edilməsinə tərəfdar olduğunu da bildirən xanım millət vəkili bu yubiley medalı ilə bağlı müvafiq Qanunda dəyişikliyi dəstəkləyib.

Millət vəkili çıxışının sonunda hər bir vətəndaşımızı, dünya azərbaycanlılarını, bütün haqsevər insanları Azərbaycanın haqq işinə dəstək verməyə çağırıb, Ordumuzun tezliklə qəti və tam qələbə çalacağına inamını bildirib.