MM-nın Mədəniyyət komitəsinin sədri Q. Paşayeva və RHİMİB sədri A. Bağırova qəhrəman şəhidimiz Röyad Məmmədovun atası Famil Məmmədovla görüşüblər.

Milli Məclisin Mədəniyyət komitəsinin sədri Qənirə Paşayeva və Regional Hüquqi və İqtisadi Maarifləndirmə İctimai Birliyinin (RHİMİB) sədri Arzu Bağırova Masallı rayon, Mahmudavar kənd sakini, şəhid əsgər Röyad Məmmədovun atası Famil Məmmədovla görüşüb.

Axar.az xəbər verir ki, Qənirə Paşayeva şəhid atasını işğalçı düşmən üzərində tarixi qələbə münasibətilə təbrik edib, ürək sözlərini bölüşüb.

“Sizin oğlunuz Vətən Müharibəsinin başlandığı ilk gündən döyüşlərə könüllü qatılıb. Azərbaycan Ordusunun əsgəri olan Röyad Füzuli və Şuşa uğrunda gedən döyüşlərdə vuruşub. O, noyabrın 8-də Laçın-Şuşa yolu istiqamətində döyüşlərdə şəhid olub.

Vətən Müharibəsinin şəhidi Röyad Məmmədov Azərbaycan Prezidentinin 15 dekabr 2020-ci il tarixli Sərəncamına əsasən “Vətən uğrunda” medalı ilə təltif edilib.

Röyad kimi vətənpərvər gənclərimizlə hər zaman qürur duyacağıq!

Sizi tarixi zəfər münasibəti ilə bir daha təbrik edirik!” – millət vəkili deyib.

Şəhid atasına tarixi zəfər münasibətilə Milli Məclisin Mədəniyyət Komitəsi və RHİMİB adından məktublar təqdim edilib.