Ana səhifə Toplum |
İnsan Alveri Qurbanlarına Yardım Mərkəzi respublikanın bölgələrində maarifləndirmə tədbirləri həyata keçirir.
Əmək və Əhalinin Sosial Müdafiəsi Nazirliyindən Axar.az-a verilən məlumata görə, Dövlət Sosial Təminat Xidmətinin tabeliyindəki İnsan Alveri Qurbanlarına Yardım Mərkəzi cari ilin yanvar-may aylarında 19 nəfər insan alveri qurbanına, habelə insan alverinin qurbanına çevrilmək təhlükəsi olan 15 nəfərə müvafiq yardımlar göstərib.
Onlardan bir çoxu eyni vaxtda müxtəlif növ zəruri yardımlarla təmin ediliblər. İnsan alveri qurbanlarından, habelə insan alverinin qurbanına çevrilmək təhlükəsi olan şəxslərdən 6 nəfəri tibbi, 9 nəfəri psixoloji, 5 nəfəri hüquqi yardımla, 1 nəfəri sığınacaqla təmin edilib. Həmçinin 9 nəfərinin ƏƏSMN yanında Dövlət Məşğulluq Xidməti tərəfindən məşğulluğunun təmin olunmasına, daha 9 nəfərinin peşə hazırlığına cəlb edilməsinə köməklik göstərilib. Bir nəfərinin ailəsinin isə ünvanlı dövlət sosial yardımı almaq hüququna baxılması üçün müvafiq rayon ƏSMM-ə müraciət edilib.
Mərkəz tərəfindən insan alveri ilə bağlı ictimai məlumatlılığın artırılması işlərinin davamı kimi, hazırda respublikanın bölgələrində "İnsan alveri ilə mübarizə" mövzusunda maarifləndirmə tədbirləri həyata keçirilir. Qazax, Ağstafa, Tovuz, Şəmkir, Gəncə, Şirvan, Salyan, Neftçala, Saatlı, Sabirabad, Kürdəmir və digər rayonlarda daha çox gənclərin iştirakı ilə təşkil olunan tədbirlərdə insan alveri anlayışı, onun növləri, insanların hansı hallarda insan alveri qurbanına çevrildiyi, habelə insan alveri ilə mübarizə formaları barədə interaktiv şəkildə məlumatlar verilib.
Keçirilən maarifləndirmə tədbirləri iyun ayı ərzində ölkənin digər regionlarında da davam etdiriləcək.
Tarix
2015.06.12 / 18:20
|
Müəllif
Nigar İxtiyarqızı
|