Milli Məclisin Mədəniyyət komitəsinin sədri Qənirə Paşayeva şəhid Pərvin İlqar oğlu Təhməzovun anası Əsli Təhməzova ilə Milli Məclisdə görüşüb.

Axar.az xəbər verir ki, şəhidin anası oğlundan danışıb, Pərvinin filoloq ixtisasına yiyələndiyini, həmçinin idmanın cüdo növü ilə intensiv məşğul olduğunu bildirib.

Komitə sədri qeyd edib ki, gənc filoloq və idmançı himnimizdə deyildiyi kimi, hüququndan keçərək, öz ömrünü ölkənin suveren hüquqlarının bərpasına, torpaqlarımızın azadlığına həsr edib:

“Pərvin kimi gənclərimizlə hər zaman qürur duyacağıq. Tanrıya çox şükür, şəhidlərimizin qanı yerdə qalmayıb, düşmən çox ağır məğlubiyyətə uğradılıb”.

Şəhid anasına Qarabağ motivli xatirə hədiyyəsi təqdim olunub.

Qeyd edək ki, hərbi xidmətdə kəşfiyyatçı olan Pərvin Təhməzov Kəlbəcər, Ağdərə, Suqovuşan və b. istiqamətlərdə vuruşub, “Vətən uğrunda” medalı ilə təltif olunub.

Ruhu şad olsun!