Lənkəran rayonun Tütəpeştə kənd sakini Gülər Nizami qızı Əliyeva 1 ildən artıqdır ki, ünvanlı sosial yardım ala bilmir.

Bu barədə Axar.az-a danışan Gülər Əliyeva bildirib ki, Əmək və Əhalinin Sosial Müdafiəsi Nazirliyinin yaratdığı elektronlaşdırılmış informasiya sistemi onun məlumatlarını hər dəfə fərqli cür təqdim edir.

Şikayətçinin sözlərinə görə, iki dəfə VEMTAS-la ünvanlı sosial yardım almaqdan ötrü elektron müraciət edib. Birinci müraciətində vətəndaşa məxsus olmayan “A 802013052096-251018” saylı reyester kodlu torpaq sahəsi onun adına göstərilməklə imtina edilib. G.Əliyeva bu barədə DSMF-nin Lənkəran rayon şöbəsinə müraciət edərək yanlışlığın aradan qaldırılmasını xahiş edib. Məlum olub ki, nazirliyin e-sosail portalında yaradılmış e-arayış bölümündəki pay torpaq mülkiyyəti haqqında arayışda vətəndaşa məxsus torpağın olması barədə heç bir məlumat mövcud deyil. Amma buna baxmayaraq, sentyabrın 20-də vətəndaşın VEMTAS-a etdiyi müraciətdən yenidən ona məxsus olmayan pay torpağının reyester kodu göstərilməklə imtina edilib.

Vətəndaş iddia edir ki, elektron sistemdə yaradılmış bu cür yanlışlıq onun ünvanlı sosial yardım alınmasına süni əngəl yaradır. O iddia edir ki, edilən şikayətlərə də nazirlik rəsmiləri şablon cavablar yazmaqla işini bitmiş hesab edirlər.

Qeyd edək ki, bununla bağlı Əmək və Əhalinin Sosial Müdafiəsi Nazirliyinə sorğu göndərilib.