Dövlət Sosial Müdafiə Fondunun sədri Elman Mehdiyev Şamaxıda 5 rayonun sakinləri üçün qəbul keçirib.

Fonddan Axar.az-a verilən məlumata görə, E.Mehdiyev avqustun 3-də Şamaxı şəhərindəki Heydər Əliyev Mərkəzində məcburi dövlət sosial sığorta ödəyiciləri və pensiyaçıları qəbul edib. Qəbulda iştirak edən Şamaxı, Qobustan, İsmayıllı, Ağsu, Kürdəmir rayonlarının sakinləri əsasən pensiyaların yenidən hesablanmasının bir sıra hüquqi aspektləri, pensiya təyinatı, əmək pensiyası növünün dəyişdirilməsi ilə bağlı müraciət ediblər.

Müraciətlər arasında başqa dövlətlərin ərazisində qazanılmış iş müddətlərinin, müvafiq arxiv sənədlərinin olmaması səbəbindən Sovet dövründə işlədikləri müddətin əmək stajlarına daxil edilməsi ilə bağlı məsələlər də olub.

Görüş zamanı əmək pensiyasının üzərinə qulluq stajına görə əlavənin hesablanması, əyani təhsil müddətinin sosial sığorta stajına daxil edilməsi və bu kimi təklif, şikayətlər dinlənilib.

Görüş zamanı ümumilikdə 30-dək vətəndaşın müraciətinə baxılıb.