Bir neçə gün öncə Prezident İlham Əliyev Türkiyənin Ali Təhsil Şurasının sədri Erol Özvarı qəbul edib. Görüşdə Azərbaycan-Türkiyə birgə universitetinin yaradılması müzakirə olunub. Türkiyə universitetlərinə etibar edən abituriyentləri indi bir sual düşündürür: universitetin fəaliyyət istiqamətləri necə olacaq?

Birgə universitet layihəsi həm Azərbaycan, həm də Türkiyə təhsili üçün ilk layihə deyil. Hazırda ölkəmizdə Fransa və Koreya ilə birgə universitetlər fəaliyyət göstərir, Türkiyə isə bu təcrübəni Qazaxıstan və digər ölkələrlə həyata keçirib. Təsis olunacaq birgə universitetdə hər iki ölkənin elmi potensialından istifadə etməklə, bu iki ölkənin vətəndaşlarına eyni güzəştlərlə xidmət göstərilməsi nəzərdə tutulur. Universitetin ilk illərdə məhdud ixtisaslarla fəaliyyət göstərməsi planlaşdırılır.

Axar.az "Xəzər Xəbər"ə istinadən xəbər verir ki, hazırda müzakirə mərhələsində olan Azərbaycan-Türkiyə Universiteti haqda qərar dəqiqləşəcəyi təqdirdə universitetə qəbul da elə növbəti tədris ili üçün nəzərdə tutulub. Bu isə universitetin ilk ilində Bakıda hansısa universitetin nəzdində açılması ehtimalını artırır. Lakin universitetin növbəti illərdə öz binasında və daha çox ixtisasla fəaliyyət göstərməsi planlaşdırılır. Universitetin məhz ali təhsil pilləsində dünya reytinqlərində yüksək nəticələr göstərmiş Türkiyə ilə birgə qurulması bura daha çox yüksək ballı tələbələrin maraq göstərəcəyi ehtimalını artırır.

Qeyd edək ki, Türkiyədə 204, Azərbaycanda isə 51 universitet fəaliyyət göstərir. Azərbaycan-Türkiyə birgə universiteti paytaxt Bakıda açılacaq. Daha sonra filialları Gəncə və Şuşada da açıla bilər. Türkiyədəki Ali Təhsil Şurası Azərbaycanda açılacaq birgə universitetlə bağlı yüksək səviyyədə hazırlıqlar aparıb.