Ötən il həm qlobal, həm də Azərbaycan turizm sənayesində 80% geriləmə var idi. Bu ilin yanvar ayından şəhər və rayonlararası gediş-gəliş bərpa olunduqdan sonra Azərbaycanda faktiki olaraq daxili turizm bərpa olunmağa başladı. İyul ayından Azərbaycana gələn xarici qonaqların sayında ciddi artım var.

Axar.az xəbər verir ki, bu sözləri Dövlət Turizm Agentliyinin müşaviri Kənan Quluzadə Feysbukda canlı yayım zamanı deyib.

“Bu ilin oktyabr ayı ilə ötən ilin oktyabr ayını müqayisə etdikdə, 167% artım var. Qapanma olmasa, 2022-ci ildə bu rəqəm daha da artacaq. Turizm sahəsində pandemiyadan əvvəlki rəqəmlərə qayıdış isə təxminən 2023-cü ildə olacaq. Əgər 2019-cu ildə Azərbaycana 3 milyon 200 min insan səfər etmişdisə, yaxın 5 ildə bu rəqəm 4 milyona çatacaq. Biz turizmin bərpasına hazırıq”, - o bildirib.

K.Quluzadə Azərbaycanda qış turizminin dekabrın 15-dən etibarən başlayacağını deyib:

“Xaricdən qonaqlarımızın olacağını gözləyirik. Çünki bunun üçün müəyyən marketinq işləri aparmışıq.

Otellərdə Yeni il şənlikləri üçün daha çox sifarişlər var. Sıxlıq müşahidə olunacaq. Şahdağ, Tufandağ, Naxçıvanda olan turizm kompleksləri yeni turizm məhsulları ilə xidmətə hazırlaşırlar. Bu, həm qonaqların sayını, həm də Azərbaycan turizminin rəqabət qabiliyyətini artıracaq”.