Tufandağda buzlaq sahəsində azalma, ərimə prosesi sürətlənib.

Axar.az xəbər verir ki, Ekologiya və Təbii Sərvətlər Nazirliyinin Milli Hidrometeorologiya Departamentinin mütəxəssisləri Tufandağ buzlağını tədqiq etmək üçün ekspedisiya təşkil edib.

3755 metr yüksəklikdə aparılmış tədqiqatlar nəticəsində ötən illərlə müqayisədə buzlaq sahəsində azalma, ərimə prosesinin daha da sürətləndiyi məlum olub. Buzlaq üzərində olan çatların sayının və ölçüsünün artdığı, buzlaq dilinin 10-13 metr geriyə çəkildiyi, buzlaq dilindən çıxan Mahmuddərə çayında suyun səviyyəsinin artdığı müəyyən olunub.

Qeyd edək ki, iqlimdə baş verən istiləşmə və ya soyuqlaşma özünü buzlaqların sahəsinin dəyişməsində çox tez büruzə verir. Buzlaqların həddən artıq əriməsi çaylarda su səviyyəsinin armasına və müəyyən zamanlarda daşqınlara səbəb olur.