Ukrayna tam şəkildə anlayır ki, Rusiya hücum əsası yaratmaq üçün Ukrayna ordusunun provokasiyalara miqyaslı cavab verməsinə cəhd göstərir.

Axar.az xəbər verir ki, bu sözləri Milli Təhlükəsizlik və Müdafiə Şurasının katibi Aleksey Danilov bu gün keçirdiyi brifinqdə deyib.

Rusiya mediasının guya Ukrayna ordusunun Rusiya ərazisini atəşə tutması barədə yaydığı xəbərə münasibət bildirən Danilov qeyd edib ki, hər şeyi başa düşürlər:

“Prezident bütün baş verənləri nəzarətdə saxlayır. O ki qaldı “kazus belli”yə (müharibə üçün əsas – red.), əlbəttə, bu, onların çoxdan yerinə yetirməyə çalışdığı tapşırıqdır. Ancaq bizim hərbçilər yalnız ordumuz üçün təhlükə yaradan təhdid zamanı cavab atəşi aça bilərlər”.

O, xüsusi olaraq bildirib ki, Ukrayna ordusu Rusiya ərazisinə heç bir atəş açmır:

“Onlar nə qədər istəyir, uydura bilərlər. Biz buna hazırıq. Bundan başqa, dünya da buna hazırdır. Rusiya bizi aktiv fəaliyyətə təhrik etməyə müyəssər olmayacaq”.