Dərman vasitələri sahəsində milli tənzimləyici qurum olan Analitik Ekspertiza Mərkəzi istehsalçı müəssisələrin GMP-inspeksiya yoxlamalarını aparmağa başlayıb.

Səhiyyə Nazirliyindən Axar.az-a verilən məlumata görə, istehsalat prosesinə nəzarət Ümumdünya Səhiyyə Təşkilatı tərəfindən təlim keçmiş və müvafiq sertifikatları olan müfəttişlər tərəfindən aparılır.

Xammalın keyfiyyəti, avadanlığın yoxlanılması, işçilərin peşəkarlıq səviyyəsi, prosseslərin validasiyası, sənədləşdirmə sistemi və s. ÜST-ün Etibarlı İstehsalat Təcrübəsi (Good Manufacturing Practice GMP) standartlarına uyğunluğu araşdırılır.

Bu cür yoxlamalar mütəmadi olaraq aparılacaq. Dərman vasitəsi qanunvericiliyə uyğun olaraq müvafiq ekspertizalardan keçirilərək Dövlət Qeydiyyatına alınacaq.

Preparata qeydiyyat vəsiqəsi veriləcək və Dərman Vasitələrinin Dövlət Reyestrinə salınacaq. Bundan sonra həmin preparatın ölkəyə idxalına və istifadəsinə icazə veriləcək.

Məqsəd əhalini keyfiyyətli, effektiv və təhlükəsiz dərman vasitələri ilə təmin etməkdir. Əhalinin sağlamlığının qorunması baxımından çox vacib və mühüm bir məsələdir. Görülən bu işlər daim davam etdiriləcək.