Tarix boyu türk ordusunun qüdrəti haqda müxtəlif fikirlər səsləndirilib. Xüsusən də, onların döyüşdə istifadə etdiyi strateji planlar bu xalqa əhəmiyyətli qələbələr qazandırıb.

Axar.az türk ordusunun döyüşdə istifadə etdiyi 5 taktiki planı təqdim edir.

1. Qurd Qapanı

İslamiyyət dönəmindən sonra "Aypara" taktikası kimi tanınan "Qurd qapanı" türklərin düşmən qoşununu əlverişsiz mövqeyə çəkmək üçün tətbiq etdiyi üsuldur.

Bu taktikaya əsasən, döyüş zamanı ordu üç tərəfə ayrılır və ortadakı mərkəzi qoşun düşmənə hücum edir. Bunun ardınca isə ordu geri çəkilərək özünü döyüşdən qaçırmış kimi göstərir. Türk ordusunun geri çəkildiyini görən düşmən hücum sürətini artırdığı vaxtda üç hissəyə ayrılan ordunun sağ və sol bölmələri tərəfindən mühasirəyə alınır. Bu strategiyanın uğurlu olduğunu göstərən ən əhəmiyyətli döyüş kimi Malazgird və Mohaç döyüşlərini göstərmək olar.

2. Son müdafiə taktikası

"Son müdafiə taktikası" Mustafa Kamal Atatürkün Qurtuluş döyüşündə tətbiq etdiyi üsuldur.

"Xətti müdafiə yoxdur, səthi müdafiə var. O səth isə bütün vətəndir" sözü ilə Atatürk əsgərə "Yanındakılar qayıtsa da, sən bir addım geri çəkilmə" əmrini verib.

Ehtiyat birliklərlə birgə bu əmri icra edən türk ordusu sonunda düşməni geri çəkilməyə məcbur edərək Sakarya zəfərini qazanıb.

3. SAD planı (ص)

Osmanlı İmperiyası zamanında tətbiq olunan bu taktika ərəbcə "sad" hərfinin yazılış formasına uyğunlaşdırılaraq hazırlanıb. Hərfin "quyruq" hissəsinə düzülən süvarilər düşmənin qaçmasına maneə törətmək üçün, hərfin cənub və şərq kimi təsvir olunan bölümünə yerləşdirilən ordu isə düşməni tam şəkildə məhv etmək üçün istifadə olunub.

4. Kəşf və yorğunluq taktikası

Türk ordusu tarix boyu böyük ordularla döyüşmək məcburiyyətində qalsa da, öz döyüş planını daim düşmən ordusunun hərəkəti üzərində qurub. Türklər adətən döyüşdən əvvəl sürətli atlı dəstələrlə düşmən mövqeyinə hücum edər və kəşfiyyat işləri görərdi.

Eyni zamanda getdikləri yerlərə özləri ilə bağlı qorxuducu hekayələr yayar və psixoloji üstünlüyü təmin edərdilər. Düşmən mənəvi olaraq çökənə qədər bu proses davam etdirilərdi.

5. Gecə basqınları

Köçəri həyat sürən türklər atlardan gecələr də peşəkarlıqla istifadə edib. Onlar çox vaxt gecə ikən gözlənilmədən hücum edərək düşməni məğlub etməyi bacarıb.