Bu gün səhər saatlarında milyonlarla istifadəçinin Feysbuk hesabında problem yaranıb. Hazırda isə sosial şəbəkədə müxtəlif qruplar şəkilində viruslar mesaj olaraq yayılmaqdadır.

Məsələ ilə bağlı Axar.az-a açıqlama verən "Multimedia" İnformasiya Sistemləri Texnologiyaları Mərkəzinin direktoru, Azərbaycan İnternet Forumunun prezidenti Osman Gündüz bildirib ki, yaranan vəziyyətlə bağlı Rabitə və Yüksək Texnologiyalar Nazirliyinin nəzdində fəaliyyət göstərən Elektron Təhlükəsizlik Mərkəzi ciddi maraqlanmalı və insanlara məlumat verməlidir.

"Prezident fərmanı ilə yaradılan qurum məhz qeyri-dövlət sektorunda informasiya təhlükəsizliyinə cavabdehdir. Yəni bu qurum həm qabaqlayıcı addımlar atmalı, təhlükə ilə bağlı xəbərdarlıqlar etməli, həm də problemlərin aradan qaldırılmasında istifadəçilərə metodiki-informasiya dəstəyi göstərməlidir. Öz internet saytı, internet media, televiziya vasitəsilə bunu bütün istifadəçilərə çatdırmalıdır. Mənim fikrimcə, əsas virus deyil, ona olan reaksiyadır. Yəni buna cavab verən dövlət qurumu öz saytında məlumat verməlidir ki, bəli, xəbərimiz var, problemi aradan qaldırmaq üçün iş aparılır. Dünya praktikasında belədir. Təəssüf ki, bu qurumun saytlarında hələlik nə xəbərdarlıq var, nə də metodiki dəstəklə bağlı informasiya".

Ekspert həmçinin insanların ehtiyyatlı olması məsələsinə də toxunub:

"Sosial şəbəkə istifadəçiləri gələn mesajları açmamalı, göndərilən faylları aktiv etməməlidirlər. Kompüterlərində də daha çox təhlükəsizlik qaydalarına əməl etməlidirlər. Antivirus proqramlarından istifadə etmələri məsləhətdir. Virus gələn qruplardan adi qaydada çıxmaq lazımdır. Həmçinin Feysbuk hesablarının təhlükəsizliyinə diqqət etməlidirlər ki, şifrələr oğurlanmasın. Dərhal şifrələri dəyişməli, həmçinin o hesaba bağlanan email ünvanlarının təhlükəsizliyinə də diqqət etməlidirlər".