Feysbukda hesabınızda şəxsi mesaj bölməsindən göndərilən mesajlara əlavə olunan keçidlərə, dostlarınızın profillərində və ya ana səhifədə paylaşılan keçidlərə daxil olmayın.

Elektron Təhlükəsizlik Mərkəzindən Axar.az-a daxil olan məlumatda bildirilir ki, Feysbuk sosial şəbəkəsində şəxsi mesajlar bölməsindən istifadəçilərə spam mesajlar göndərilir. Şəxsi mesaj xanasından göndərilən spam mesajlar aldadıcı xarakter daşıyır və istifadəçilərin kompüterinə ziyanverici proqramın yüklənməsinə gətirib çıxarır. ETM şəxsi mesaj bölməsindən göndərilən mesajlara əlavə olunan keçidlərə, dostlarınızın profillərində və ya ana səhifədə paylaşılan keçidlərə daxil olmamağı tövsiyə edir. Həmçinin keçidə kliklənən, bu halda kompüterə endirilən faylı açmaq məsləhət görülmür.

ETM-dən həmçinin deyilir ki, əgər ziyanverici proqram artıq kompüterinizə yayılmışsa, bu halda kompüterin İdarəetmə panelindən (Control Panel) kompüterə yüklənən tanımadığınız proqramları silin (Uninstall). Brauzerin Extensions (genişlənmə) bölməsindən bütün genişlənmələri silin. Feysbukda Uyğulamalar bölməsində olan proqramları da silin. Bunun üçün Tənzimləmələr bölməsini seçin və Uyğulamalara daxil olun. Uyğulamaların adlarının sağ tərəfində "sil" əmrini seçin. Həmçinin antivirus vasitəsi ilə kompüterinizi viruslardan təmizləyin. Bununla yanaşı, brauzerin silinməsi və yenidən kompüterə yüklənməsi məqsədəuyğun hesab olunur.

Qeyd edək ki, Mərkəzin əməkdaşları problem üzərində işləri davam etdirir və əlavə məlumat veriləcək.