17:06

Tərtər rayonunda ölümlə nəticələnən yol qəzası baş verib.

Report-un məlumatına görə, hadisə rayonun Sarıcalı kəndi ərazisində qeydə alınıb.

Yol-nəqliyyat hadisəsi "Mersedes" markalı minik avtomobili ilə VAZ-21099 markalı avtomobilin toqquşması nəticəsində baş verib. Hadisə zamanı iki nəfər ölüb, iki nəfər isə ağır bədən xəsarətləri alıb. Yaralılar Bərdə Rayon Mərkəzi Xəstəxanasına (RMX) yerləşdirilib. Baş verən yol qəzasında ölən və yaralananların hələlik şəxsiyyəti məlum deyil.

Faktla bağlı araşdırmalara başlanılıb.

19:12

Qəzada VAZ-21099 markalı avtomobilin sürücüsü 33 yaşlı Tehran Hüseynov və "Mersedes"də olan sərnişin 76 yaşlı Rəfiqə Kazımova hadisə yerində keçinib.

Hadisə zamanı hər iki avtomobildə olan 4 sərnişin - 41 yaşlı Nofər Qurbanov, 16 yaşlı Elşən Baxşəliyev, 46 yaşlı İsaq Kazımov və 35 yaşlı Mənsurə Qurbanova ağır bədən xəsarətləri alıb. Yaralılar ilk olaraq Tərtər Mərkəzi Rayon Xəstəxanasına yerləşdirilsələr də, vəziyyətləri ağır olduğu üçün Bərdə Mərkəzi Rayon Xəstəxanasına aparılıblar.