13:14

Nizami rayonu ərazisindəki Özbəkistan küçəsinin sonunda yerləşən işıqforun yaxınlığında daimi olaraq şəkildə gördüyünüz bu avtomobil park edilir.

Axar.az xəbər verir ki, Özbəkistan küçəsində hərəkət bu avtomobilin işıqforun altında park edilməsi səbəbindən birzolaqlı yola çevrilir, nəticədə 30 saniyədən də az “yaşıl keçid” verən işıqfordan nəqliyyat vasitələrinin sürətli keçidi mümkün olmur və sıxlıq yaranır. Özbəkistan küçəsindən sağa və sola hərəkət olduğundan, park edilən avtomobil həm də avtomobillərin dönməsinə və beləliklə bir-birinin yoluna çıxmasına şərait yaradır.

Daimi olaraq sözügedən ərazidə bu nəqliyyat vasitəsinin park edilməsindən ilhamlanan digər sürücülər də həmin yerdə avtomobillərini park edirlər ki, bu da daha böyük sıxlığa səbəb olur.

Bakı şəhər DYP İdarəsindən sorğumuza cavab olaraq bildirildi ki, paytaxtın Nizami rayonu Özbəkistan küçəsində dayanma və durma qaydalarını kobud şəkildə pozaraq ərazidə sıxlığın yaranmasına səbəb olan nəqliyyat vasitələrinin sürücüləri barəsində qanunamüvafiq tədbirlər görülüb.