Bakı şəhəri, Yasamal rayonu Zivər bəy Əhmədbəyov ünvanında yerləşən 2 saylı Qadın Məsləhətxanası istilik sistemi ilə təchiz olunmayıb.

Axar.az xəbər verir ki, həkimlər xəstələri müayinə otaqlarında qalın gödəkçə ilə, üst geyimlərini çıxarmadan müayinə edir, xəstələr isə müəssisənin dözülməz soyuğundan şikayətləniblər.

Həkimlərin sözlərinə görə, müəssisə köhnə tikilidir, qısaqapanmalara, yanğına səbəb olma ehtimalı çox olduğu üçün hər müayinə otağında yalnız bir radiator və qızdırıcının quraşdırılmasına icazə var. Bu isə otaqların qızdırılmasına kifayət etmir.

Məsələ ilə bağlı TƏBİB-dən sorğumuza cavab olaraq bildirib ki, yaxın vaxtlar üçün müəssisənin təmiri nəzərdə tutulub:

“Bakı Baş Səhiyyə Mərkəzindən bildirilib ki, 2025-ci il təmir planına uyğun olaraq 2 nömrəli Qadın Məsləhətxanası cari təmirə cəlb olunub. Cari il ərzində tibb müəssisəsinin təmir olunması, istilik sisteminin yenidən qurulması nəzərdə tutulub”.