Yeni istifadəyə verilmiş Böyükşor–Pirşağı avtomobil yolunun bir hissəsi müvəqqəti olaraq bağlanıb. Hazırda hərəkət yalnız yolun bir tərəfində mümkündür və həmin hissədə iki istiqamətli nəqliyyat axını təmin olunur. Bu səbəbdən bəzi saatlarda yolda sıxlıq müşahidə edilir.

Məsələ ilə bağlı Axar.az-ın sorğusunu cavablandıran Azərbaycan Avtomobil Yolları Dövlət Agentliyi bildirib ki, hazırda yolda təmir deyil, layihənin tamamlanması prosesi aparılır.

“Bildiyiniz kimi, ötən il Bakıda keçirilən mühüm tədbir ərəfəsində həmin yol istifadəyə verildi. Tədbirə qədər yolun üst layına asfalt örtüyü döşənərək istismara açıldı, lakin aşınma qatı sonrakı mərhələyə saxlanıldı.

Hazırda isə bağlanan hissədə aşınma qatının döşənməsi, yəni son asfalt qatının vurulması işləri aparılır. Bununla yanaşı, yolda 3 yerüstü piyada keçidinin layihələndirilməsi və tikintisi də davam etdirilir.

Qeyd etmək istərdik ki, bu, təmir işi deyil. Yolun texniki baxımdan təmirə ehtiyacı yoxdur. Sadəcə olaraq, layihə çərçivəsində nəzərdə tutulan son tamamlanma işləri həyata keçirilir”.