Parisdə üç PKK-çı qadını öldürən Ömər Güneyin iki nəfər MİT agenti ilə cinayət planı haqda danışdığı bir səs yazısı yayımlanıb. Əldə edilən məlumatlara görə, Milli İstihbarat Təşkilatı (MİT) səs yazısı ilə əlaqədar araşdırma aparır.

"Axar.az" xəbər verir ki, keçən il yanvarın 10-da Parisdə üç PKK-çı qadını öldürən Ömər Güneyin səs yazısı "Yutub"da yayımlanıb. Güneyin, "mənə bir şey olsa, bu səs yazısını yayımlayın", - deyə MİT-çilərlə olduğu bir toplantının səs yazısını bir tanışına verdiyi bildirilib. Ömər Güneyin tanışı videonun başlığında bunları yazıb:

"Mən Fransanın Paris şəhərində üç qadını öldürən Ömər Güneyin tanışıyam. Ömər 17 yanvar tarixində (2013) həbs olundu. Ömər həbs olunmamışdan əvvəl məlumat və sənədləri mənə verdi ki, başına bir iş gəlsə, yayımlayım. Ömər Parisdə öldürdüyü üç qadının qətl tapşırığını MİT-dən alıb. Hədəfində olan əsas şəxs Səkin Cansız idi. Digər iki qadını isə orada olduqları üçün öldürmək məcburiyyətində qalıb. Hadisədən əvvəl dəfələrlə Türkiyəyə gedib və MİT-çilərlə görüşüb, qətlin planını cızıblar. Təyyarə biletlərini MİT-çilər alıb. Öldürmək üçün istifadə etdiyi silah və digər şeyləri almaq üçün pulu belə MİT-çilər verib. MİT-çilərlə danışığını qeydə alıb. Bu səs yazısının bəzi yerlərini mənə verib ki, başına bir iş gəlsə, yayımlayım. Ömər həbsdədir. Heç kim itirib-axtarmır. MİT-çilər Ömərdən istifadə ediblər. Ömərin məndən istədiyi bunlar idi. Hamısını yazdım".