Tehran Moskva üçün son dərəcə əhəmiyyətlidir, bu baxımdan İranın Rusiya lehinə mövqe sərgiləməsi təbiidir.

Bu sözləri Axar.az-a açıqlamasında analitik Vüqar Zifəroğlu deyib. Onun sözlərinə görə, İran hər zaman Yaxın Şərq maraqlarından çıxış edərək öz siyasətini diqtə edən bir ölkədir:

"Hazırda yaxın Şərqdə baş verən proseslərdə Türkiyə ilə İranın mövqeyi bir çox məsələdə kəsişir. Bu, Suriya, Yəmən məsələsində olduğu kimi, digər məqamlarda da açıq şəkildə görünür. Başqa bir tərəfdən isə İranla Türkiyə arasında Yaxın Şərq uğrunda əzəli bir rəqabət var və bu rəqabət indi də davam etməkdədir. Bu baxımdan İranın Türkiyə əleyhinə bəyanatlar səsləndirməsi normaldır. İranla Rusiya bir çox hallarda bölgədəki maraqlarını uzlaşdırırlar".

Analitik bilidirib ki, Rusiya ilə İran arasındakı birlik bəzi siyasi faktlara söykənir:

"ABŞ-ın Cənubi Qafqaz və Orta Asiyaya nüfuz etməyə çalışmasını hər iki ölkə ortaq təhdid olaraq görür. İkincisi, hər iki tərəf üçün Xəzər enerji qaynaqlarından Qərb şirkətlərinin istifadəsi və üçüncü dövlətin bölgədə olması arzuolunmazdır. Üçünüsü, Tehranın xarici ölkə gəmilərinin İran körfəzində olmasına qarşı mövqeyini Moskva da müsbət qarşılayır. Dördüncüsü, hər iki ölkənin xarici siyasətində yanacaq ehtiyatlarından siyasi alət kimi istifadəvə bunun müəyyən məqamlarda təzyiq alətinə çevrilməsi adi hala çevrilib. Bir sözlə, Rusiya və İran Yaxın Şərqdə güclü Türkiyə istəmir və bu məsələdə Tehran heç vaxt Moskva əleyhinə mövqe sərgiləməyəcək".