Son zamanlar Sərkisyanın Petrosyanla məsləhətləşmələr aparması və əzəli düşmənlər arasındakı bu yaxınlaşma, əslində, vaxtilə Azərbaycanla mümkün kimi görünən razılaşmanın məqamları ilə də bağlı ola bilər.

Bu sözləri Axar.az-a açıqlamasında analitik Vüqar Zifəroğlu deyib. Onun sözlərinə görə, Sərkisyan hazırda nəinki baş verənlər, hətta yaxın gələcəkdə olacaqlarla bağlı məsuliyyəti tək bölüşmək istəmir:

"Petrosyanla görüşün arxasında da məhz bu amil dayanır. Maraqlı nüans odur ki, Levon Ter-Petrosyan məhz Azərbaycanla razılaşma reallaşacağı zaman çevrilişlə hakimiyyətdən salındı və həmin vaxt iqtidara gələn komandanın tərkibində hazırkı prezident də var idi. Son zamanlar Sərkisyanın Petrosyanla məsləhətləşmələr aparması və əzəli düşmənlər arasındakı bu yaxınlaşma əslində, vaxtilə Azərbaycanla mümkün kimi görünən razılaşmanın məqamları ilə də bağlı ola bilər. Ermine Naqdalyanın açıqlaması isə Ermənistanın mövcud siyasi rejimindən narazı olan daxili auditoriyanın nəbzini yoxlamaq kimi qiymətləndirilə bilər. Diqqət edin, buna paralel olaraq, Ermənistan Dağlıq Qarabağda kök salmış qondarma rejimin tanınması proseduruna da start verdi. Baxmayaraq ki, bu tanımanın özü də real görünmür və siyasi blef rolunu oynayır".

Qeyd edək ki, Ermənistanın AŞPA-dakı nümayəndə heyətinin rəhbəri və parlamentin vitse-spikeri Ermine Naqdalyanın ötən gün dediyi "Beynəlxalq hüquq bizə Qarabağ ətrafı ərazilərə nəzarət etmək haqqı vermir" sözləri birmənalı qarşılanmır. Hakim komandanın təmsilçisinin belə bir ifadə işlətməsi Sərkisyan hakimiyyətinin Dağlıq Qarabağ ətrafındakı 7 rayonu işğaldan azad edəcəyinin anonsu kimi qəbul edilir.