O, avtomobillərin şüşəsini sındıraraq, silsilə oğurluqla məşğul idi.

Binəqədi Rayon Polis İdarəsinin (RPİ) 5-ci PB-dən Axar.az-a verilən məlumata görə, ötən il dekabrın 29-da S.S.Axundov küçəsində Ağdam rayon sakini Bəhruz Əliyevin idarə etdiyi "İsuzu" markalı avtomobildən mobil telefon və planşet oğurlanıb.

Cinayəti törətməkdə şübhəli bilinən Bakı sakini, 1986-cı il təvəllüdlü Ayaz Əliyev tutulub və ondan 450 qram marixuana götürülüb.

Araşdırma zamanı müəyyən edilib ki, o, ötən il oktyabrın 15-də S.S.Axundov küçəsində Sevinc İsmayılovaya məxsus "Toyota Rav-4" markalı avtomobildən, şüşəsi sındırılmaqla 300 ABŞ dolları, şəxsiyyət vəsiqəsi və digər əşyalar olan əl çantasını, dekabrın 1-də isə Sənani Bağırova məxsus Naxçıvani küçəsində yerləşən mağazada vitrindən 1 ədəd planşet oğurlayıb.

Faktla bağlı araşdırma aparılır.