Azərbaycan Respublikası Mədəniyyət və Turizm Nazirliyinin və Milli Kitabxananın birgə layihəsi əsasında yaradılan "Açıq kitabxana" layihəsi oxuculara və paytaxt sakinlərinə təqdim ediləcək.

Milli Kitabxanadan Axar.az-a verilən məlumata görə, bu layihəyə əsasən, M.F.Axundov adına Azərbaycan Milli Kitabxanasının Rəşid Behbudov küçəsinə baxan hissəsində olan bağçasında günün 24 saatı ərzində oxucuların və vətəndaşların sərbəst şəkildə kitab mütaliə etməsinə şərait yaradan sərbəst mütaliə guşəsi açılacaq.

Eyni zamanda açıq kitabxanada "Mən oxudum, sən də oxu" devizi altında "Kitabı kitaba dəyişmə" guşəsi də fəaliyyət göstərəcək. Burada hər bir vətəndaşa artıq özünün mütaliə etdiyi kitabı gətirərək həmin guşəyə təhvil vermək və əvəzində mütaliə etmədiyi kitabı aparmaq imkanı yaradılacaq.

Bundan başqa, istənilən müəllif yeni çap olunan kitabını satış üçün bu açıq kitabxanaya təqdim edəcək və müəyyən müddətdən sonra satılan kitablarının dəyərini geri ala biləcək. Bu guşədə həmçinin Azərbaycanda, Rusiyada və digər xarici ölkələrdə çap olunan istənilən kitabın onlayn sifarişi və oxuculara çatdırılması sistemi də təşkil olunacaq.