Azərbaycanın tanınan şairi Rüstəm Behrudi Yazıçılar Birliyindən istefa verib. Bu haqda şair Feysbuk hesabında paylaşdığı statusda bildirib. Şairin bu qərarının səbəbi çox maraqlıdır. Sən demə, illərdir R.Behrudi ad günlərində AYB-dən bir quruca təbrik almayıbmış.

Axar.az Musavat.com-a istinadla R.Behrudinin həmin statusunu təqdim edir:

"Mən az qala 30 ilə yaxındir ki, əvvəllər SSRİ Yazıçılar İttifaqının, sonradan Azərbaycan Yazıçılar Birliyinin üzvü oldum. Və bir Tanrı şahiddir ki, o təşkilatdan heç bir umaçağım olmadı. Ancaq indi baxıb görürəm ki, bu uzun illər ərzində ədəbiyyat tüccarlarına doğum günlərində mədhiyyə oxuyan YB-nin ədəbi orqanları bircə dəfə də olsun, doğum günlərimdə adımı çəkməyib. Niyə? Görəsən şeirləri türk dünyasında dillər əzbəri olan bir şairə bu cür münasibət hardan qaynaqlanır? Bir quruca təbrikə nə deyirsiniz, əfəndilər?

YB üzv olmaq məsuliyyətindən özümü bu gündən qurtarmış hesab eləyirəm.

Hamıya sevgi və sayğılarımla!

Rüstəm Behrudi".

Şair bildirib ki, indəyədək nə "Ədəbiyyat" qəzeti, nə "Ulduz" jurnalı onu doğum günündə yada salmayıb.

"Məni saya salmayan bir qurumda niyə qalmalıyam?!" - deyən şair bu addımının həm də AYB rəhbərliyinə etiraz olduğunu söyləyib.