Firuz Mustafanın yeni əsəri Ginnesin Rekordlar Kitabına düşə bilər.

Bu barədə Axar.az-a yazıçı, dramaturq Firuz Mustafa özü məlumat verib. O, tarixi mövzuda irihəcmli əsər yazdığını və bu əsərin Ginnesin Rekordlar Kitabına düşə biləcəyini deyib:

"Son vaxtlar 20-ci illər hadisələri haqqında bir tarixi dram üzərində işləyirəm. Tarix səhnəsində SSRİ-nin və Demokratik Cümhuriyyətin qurucularıdır. Tərəflər arasında böyük kolliziyalar baş verir, barışmaz mübarizə gedir. Amma mənə elə gəlir ki, bu əsəri tamaşaya qoymaq müşkül məsələ ola bilər. Çünki əsərin həcmi çox genişdir. Bəlkə də dünyada ən irihəcmli səhnə əsərlərindən biri olacaq və bu cəhətdən Ginnesin Rekordlar Kitabına düşə bilər. Doğrudur, dünya teatrı tarixində bir neçə gün ard-arda nümayiş olunan "serial tamaşalar" da olub. Amma mən özüm bu cür "çoxseriyalı" səhnə əsərlərini qəbul etmirəm. Hesab edirəm ki, gələcəkdə bu əsəri bir ssenari kimi işləyib film çəkmək olar.

O ki qaldı artıq görülmüş işlərə... Bu il Rusiya və Türkiyədə pyeslərim tamaşaya qoyuldu. İranlı rejissor əsərimə quruluş verdi. Gördüyünüz kimi, mənim son zamanlar fəaliyyətim xaricdəki teatrlarla bağlı olub. Bu əlaqələr yenə davam edəcək. Bizdə mövcud olan bütün teatrlara pyes təqdim etmişəm. Nədənsə son illər mənim əsərlərim səhnədə az-az görünür. Belə hesab edirəm ki, bu işdə kiminsə görünməz "barmağı" var. Amma mən belə xırda şeylərə çox fikir vermirəm, yaradıcılıq davam edir.

Mənim üçün xoş olan hadisələrdən biri də budur ki, Türkiyədə elmi və pedaqoji fəaliyyətlə məşğul olan professor Babək Qurbanov bu yaxınlarda yaradıcılıq fəaliyyətimlə bağlı "Firuz Mustafanın yaradıcılığına baxış (Dörd bucaq)" adlı bir kitab nəşr etdirdi.

Mən, adətən, görülmüş işlər barədə danışıram. Zira, müşahidə etmişəm, çox vaxt heç bir işlə məşğul olmayan adamlar "gələcək fəaliyyətlərindən", "qarşılarına qoyduqları böyük planlardan" danışmağı xoşlayırlar. Əlbəttə, hər bir yazı-pozu adamının müəyyən bir yaradıcılıq planı olur, amma yazıların gələcək zamanla bir əlaqəsi olmur. Bütün yazılanların tarixi keçmiş zamanla bağlıdır. Bir sözlə, yaradıcılıq, daha doğrusu, əsl yaradıcı adam heç vaxt nəyisə vəd verməyi xoşlamır və xoşlamamalıdır da".