Bu qarşılıqlı proses bir tərəfdən ədəbiyyatı diri saxlayır, digər tərəfdən onu yeni, maraqlı ideya və üslublarla qidalandırır.

Bu sözləri tanınmış jurnalist, professor Qulu Məhərrəmli Axar.az-ın "Çağdaş Azərbaycan ədəbiyyatına dünya oxucusunun diqqətini necə çəkmək olar" sualına cavab verərkən deyib:

"Əslində, milli səviyyədə hər bir ədəbiyyatın müəyyən özəlliyi var və bu da həmin ədəbiyyatın bədii ölçülərini, simasını müəyyənləşdirir. Bu mənada, məsələn, Mirzə Cəlil, Ə.Haqverdiyev, M.Ə.Sabir ədəbi fakt kimi xarici oxucular üçün də çox cazibədardır. Təbii ki, ümumbəşəri hadisə olduğuna görə istənilən xalqın ədəbiyyatı dünya ədəbi prosesinə töhfə verməli, həm də o prosesdən bəhrələnməlidir. Bu qarşılıqlı proses bir tərəfdən ədəbiyyatı diri saxlayır, digər tərəfdən onu yeni, maraqlı ideya və üslublarla qidalandırır. Məncə, Azərbaycan ədəbiyyatı bu prosesdə iştirak etmək və "maraqlı səviyyə"də olmaq üçün müasir insanın ətraf və cəmiyyətlə münasibətindəki dərin qatları, insan və zaman kontekstində fərqli düşüncə qatlarındakı psixologizmi daha maraqlı üsullarla açıb göstərməyi hədəf götürməlidir. Yəni müasir ədəbiyyatımızdakı bu ənənəni bir az da cilalamalıdır. Mən demirəm ki, hamı Panteleyev, Borxes, Kafka, Markes, yaxud Murakami kimi yazmalıdır, amma dünyaya çıxmaq istəyən hər kəs ictimai varlıq kimi insanın yaşadığı cəmiyyətdə onu sıxan sosial-mənəvi mühitə etirazının qeyri-ənənəvi bədii inikasını yaratmağı bacarmalıdır".