Söhbət əsl ədəbiyyatdan gedirsə, demək, cəmiyyətdə baş verən bütün proseslər bu ədəbiyyatda öz həllini tapıb. Yəni əsl ədəbiyyat cəmiyyətə mayak olmalı, ona yol göstərərək, tərbiyə etməlidir. Əsl ədəbiyyat təkcə cəmiyyətə deyil, dünyaya xidmət etməlidir.

Bu sözləri şair, AYB-nin Hərbi Vətənpərvərlik komissiyasının sədri Şahin Musaoğlu Axar.az-ın "Əsl ədəbiyyat nümunəsi necə olmalıdır" sualına cavab verərkən deyib. O, ədəbiyyatın cəmiyyətdən öndə getməsinin mühüm olduğunu bildirib:

"Bəşəriyyətə, insanlığa xidmət edən bədii nümunələr həmişə öz aktuallığını və milyonlarla oxucu kütləsini qoruyub saxlamaqdadır. Belə əsərlər forma, məzmun və üslubdan asılı olmayaraq, cəmiyyəti qabaqlayaraq öndə gedir və öz arxasınca aparır. Amma zamanın və hadisələrin arxasınca gedən ədəbiyyatı cəmiyyət nə qəbul, nə də həzm edə bilir.

Məncə, cəmiyyətin ədəbiyyata münasibətində yaranan bu problem ədəbiyyatın özündən, yeni ədəbi əsərlərin böyük sənət əsərləri ola bilməməsindən qaynaqlanır. Bura həm də ədəbiyyatın şah incilərinin kifayət qədər, yetərincə və professional şəkildə dilimizə tərcümə olunmamasını əlavə etmək olar".