Ümumiyyətlə, mən ədəbiyyatın sosiallaşmasının, siyasiləşməsinin tam əleyhinəyəm. Ədəbiyyat böyük, ali sözdür, ali sözü gündəlik sosial-siyasi hadisələr səviyyəsinə salmağın tərəfdarı deyiləm.

Bu sözləri yazıçı İlqar Fəhmi ədəbiyyatın siyasiləşməsi, sosiallaşması haqda deyib. O, bunun üçün publisistikanın daha uyğun olduğunu bildirib:

"Tənqidçilər bu xüsusda məni də həmişə ittiham ediblər. Hətta "Aktrisa" filmi çıxanda da yazmışdılar ki, niyə əsərdə cəmiyyətin sosial problemləri öz əksini tapmır? Gülüncdür, məncə. Əgər ədəbiyyat bu məsələlərə həsr olunacaqdısa, onda publisistika nə üçündür? Ədəbiyyat publisistikadan bir pillə yuxarı dayanıb həmişə. Çünki hətta gündəlik ictimai-siyasi hadisələri də ümumiləşdirib, məişət səviyyəsindən yuxarı qaldıra bilib. Amma əfsus ki, son onilliklərdə bunun əksini görürük. Ədəbiyyat adlandırdığımız məhsullar heç publisistikadan fərqlənmir, az qala, şeirlər də qəzet məqaləsi kimi yazılır. Məncə, bu hal ədəbiyyatın çöküşüdür".