Axar.az şair Mina Rəşidin uşaq şeirlərini təqdim edir.

ÇİÇƏYİN ÇƏTİRİ

Yağış yağır səhərdən,

Hələ külək də əsir.

Əlindəki çətirlə

Çiçək yaman tələsir.

Məktəb harada qaldı?

Buludlara uçur o.

Gedə bilmir, çətirin

Arxasınca qaçır o.

AYAQQABI ADASI

Burda çoxlu çeşid var

Götürürdüm, baxırdım.

Zəhraya mağazadan

Ayaqqabı alırdım.

Zəhra dedi: "Ay aman,

Biz gəlmişik uzaya!"

"Ayaqqabı adası" -

Söylədi mağazaya.

GÖY QURŞAĞI

Göy qurşağı kimidir

Bizim balaca Nərmin.

Gör bir neçə rəngi var

Əynindəki köynəyin.

QARA ÜZÜM

Bu qaraca qıza bax,

Qapqara üzüm yeyir.

"Üzümlərin qəşəngi

Qara üzümdür", - deyir.

MƏN MƏKTƏBƏ HAZIRAM

Bu yay anam müəllim,

Mən də şagird olmuşam.

Dərsimi bilməyəndə

Qızarıb ağlamışam.

Sonra da çox çalışıb

"5" almışam anamdan.

Mükafatım da olub

Bu planşet atamdan.

Hərfləri öyrəndim

Oxuyuram, yazıram.

Altı yaşım var daha

Mən məktəbə hazıram.

KİM DƏRSİNİ BİLMİRSƏ

Bacını tərifləsən

Qardaş küsür o anda.

Qardaşı tərifləsən

Bacı inciyir onda.

"Mən sizi çox sevirəm" -

Axırda ana deyir.

Kim dərsini bilmirsə

Ana ondan inciyir.