Azərbaycan Respublikasının Prezidenti yanında Bilik Fondu Cocuq Mərcanlı kəndində tikiləcək kitabxanaya 500 kitab hədiyyə edəcək.

Bu barədə Kult.az-a Azərbaycan Respublikasının Prezidenti yanında Bilik Fondunun İnformasiya təminatı sektorundan verilən məlumatda deyilir.

Fondun heyəti Prezident İlham Əliyevin “İşğaldan azad edilmiş Cəbrayıl rayonunun Cocuq Mərcanlı kəndinin bərpası ilə bağlı tədbirlər haqqında” Sərəncamından sonra artıq 190 ailənin doğma yurdlarına köçmək istədiklərini xatırladaraq, kəndi kitabla təmin etməkdən böyük məmnunluq duyduğunu bildirib.

Məlumatda həmçinin ordumuzun aprel döyüşlərindəki qəhrəmanlığından, strateji Lələ təpə yüksəkliyinin azad olunmasından söz açılıb.

Qeyd edək ki, Prezident İlham Əliyevin Cocuq Mərcanlı kəndinin bərpası ilə bağlı sərəncamında deyilir:

“Cəbrayıl rayonunun Cocuq Mərcanlı kəndinin bərpası ilə bağlı görüləcək işlər çərçivəsində birinci mərhələdə 50 fərdi yaşayış evinin, məktəb binasının və müvafiq infrastrukturun tikintisi üçün Azərbaycan Respublikasının 2017-ci il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Azərbaycan Respublikasının Qaçqınların və Məcburi Köçkünlərin İşləri üzrə Dövlət Komitəsinə ilkin olaraq 4,0 (dörd) milyon manat ayrılsın”.