Gənc Tamaşaçılar Teatrında yazar Ayxan Ayvazın “Buri” kitabının təqdimat mərasimi keçirilib.

Kult.az xəbər verir ki, mərasimdə tanınmış yazıçılar, şairlər, tənqidçilər, aktyorlar və oxucular iştirak edib. İştirakçılar həmçinin doğum gününü qeyd edən müəllifə müxtəlif hədiyyələr veriblər.
Doğum günü Ümumdünya gülüş gününə - aprelin 1-nə təsadüf edən müəllif hər kəsi pozitiv olmağa, həyatı sevməyə çağırıb:

“Bu kitab həyatımda mühüm yer tutur. Ən yaxşı hesab etdiyim hekayələrimi bu kitaba daxil etmişəm. Oxucu marağı gözlədiyimdən çox oldu. İkinci imza günü keçirməyi fikirləşirəm. Həmin mərasimin hansı tarixdə keçiriləcəyini yaxın günlərdə açıqlayacağam”.

Hekayələrindən birinin – “Buri”nin adını kitaba verən Ayxan Ayvaz maraqlı bir addım ataraq, kitabların yanına çörək dilimləri də qoyub.

Qeyd edək ki, “Qanun” nəşriyyatında çap olunan “Buri” (“Çörək”) kitabında A.Ayvazın on seçmə hekayəsi yer alıb.