Azərbaycanlı şair, yazıçı və xalq qəhrəmanı Mərziyə Məhəmmədi Oskui 1945-ci ildə Təbriz yaxınlığında yerləşən Üsküdə anadan olub.

Orta məktəbi bitirdikdən sonra Təbrizdə, daha sonra Tehran Universitetində təhsil alıb.

1970-ci ildə tələbələrin etiraz aksiyalarının təşkilində fəal rol oynayıb. Buna görə də SAVAK məmurları tərəfindən təqiblərə məruz qalıb və 1974-cü ildə SAVAK məmurları ilə silahlı toqquşmalar zamanı həlak olub.

Təəssüf ki, Mərziyənin farsca və türkcə olan əsərləri hələ də toplu şəklində çap edilməyib.

Kult.az Mərziyə Məhəmmədinin şeirini təqdim edir:

Xırdaca, incə arxdım

Meşələrdən, dağlardan

dərələrdən axırdım;

Bilirdim durğun sular

öz içində boğular,

Bilirdim dəryalarda

dalğalar qucağında

xırdaca arxlar üçün

yeni həyat doğular;

Nə yolun uzaqlığı,

nə qaranlıq çuxurlar,

nə durğunluq həvəsi

məni yoldan qoymadı;

İndi qarışmışam mən

qurtulmaz dalğalara;

varlığımız çalışmaq

yoxluğumuz dayanmaq.