Kult.az Aqşin Evrənin iyulun 4-ü Füzulinin Alxanlı kəndində erməni silahlı qüvvələri tərəfindən qətlə yetirilən 2 yaşlı Zəhraya həsr etdiyi şeiri təqdim edir:

Atama gecə teleqramı

(2 yaşlı Zəhranın atasına dedikləri)

Mən yaxşı insan oldum, ata, yaxşı insan oldum

Həyatla yaxşı keçindim ki, səni məndən almasın
Kişi kimi yox, insan kimi ağrıdım
Ayaqsız birini görəndə axsadım ki, tək qalmasın

Mən çoxlu insan oldum, ata, çoxlu insan oldum

Ömrünü qaranlığa ötürən birinə...
Gözlərini itirən birinə gül qoxlatdım
İnandırdım ki, gül baxmaq üçün yox, iyləmək üçündür

Qulağı eşitməyən qonşu Əvəz dayıya
gülümsəyən uşaq şəkilləri göstərdim
Axı uşaqların şəkli də gülüşləri eşitmək üçündür

Bütün güllələrə qucaq açdım, ata,
Partlamayan mərmiləri tapıb hamısına təşəkkür elədim
Yaxşı insan oldum, ata, yaxşı insan oldum
Bircə... sənin qədər ola bilmədim.