Siyahıya daxil edilən kitablardan da görsənir ki, məqsəd heç də hansısa bir ideologiyanın, hansısa bir partiya və dərnək maraqlarının dəstəklənməsinə yönəlməyib.

Kult.az xəbər verir ki, bu sözləri Azərbaycan İnternet Forumunun prezidenti Osman Gündüz Naxçıvan Muxtar Respublikası Ali Məclisinin sədri Vasif Talıbovun “Oxunması zəruri olan kitabların siyahısı”nı təsdiqləyən sərəncamını şərh edərkən qeyd edib. Ekspert bildirib ki, kitab oxumaq daxildən gələndə, mediadan və efirdən təşviq olunanda daha yaxşıdır:

“O ki qaldı təqdimatın formatına, yəni 1-ci şəxs tərəfindən sərəncamla bunun edilməsinə, əlbəttə, burda başqa variant bəlkə də daha uğurlu alınardı. Əgər yaxşı SMM mütəxəssislər olsaydı, yəqin ki, bu addımı cənab Talıbovun MR-in Təhsil Nazirliyinə və ya Mədəniyyət Nazirliyinə bu istiqamətdə bir tövsiyyələrin hazırlanması haqqında sərəncam olaraq da təqdim edə bilərdilər”.

Sərəncamın istənilən halda faydalı və gərəkli bir addım olduğunu söyləyən Osman Gündüz Naxçıvan Muxtar Respublikasının elektron hökumət quruculuğundakı problemlərdən də danışıb:

“Düşünürəm ki, Muxrar Respublikada vacib xidmətlərin elektron formaya keçirilməsi, ictimai-faydalı informasiyaların rəsmi saytlarda açıqlanması da vacib məqamlardandır. Təəssüf ki, burada e-gov portalı işləmir və portalın Feysbuk səhifəsi də 2014-cü ildən bəri yenilənmir. Bu cür dövlət xidmətlərinin, dövlət informasiya sistemlərinin, ictimai informasiyaların da siyahısının dərc olunmasını və tezliklə icra olunmasını arzulayırıq”.

Qeyd edək ki, iki gün öncə Naxçıvan Muxtar Respublikası Ali Məclisinin sədri Vasif Talıbov “Oxunması zəruri olan kitabların siyahısı”nı təsdiq edən sərəncam imzalayıb.