Azərbaycanın istedadlı şairlərindən Aqşin Evrənin şeiri Təbrizin "Sancaq" qəzetinin bugünkü sayında dərc olunub.

Kult.az xəbər verir ki, bu barədə güneyli şair Ümid Nəccari məlumat verib. O bildirib ki, qəzetdə Aqşin Evrənin “Unutmağın resepti” adlı şeiri dərc edilib və şair haqda məlumat yerləşdirilib.

Şeir güneyli oxucular tərəfindən maraqla qarşılanıb.

"Unutmağın resepti" şeirini təqdim edirik:

Hərdən onun toxunduğu yerlər qopar bədənindən
hissə-hissə yoxa çıxarsan hərdən
Hərdən “qayıt, ölürəm” kimi oxunar
ona yazdığın bircə “Salam. Necəsən?”

Sıxılarsan...
Bilməzsən hara qoyasan bu nəhəng ayrılığı
Görərsən saçların onun çiyni üçün darıxır

Ayrılıq sevgiyə yox, ölümə daxildi, qızım...
Bunu da öyrənmişdin uşaqlıq paltarından
Gör ayrılığın üstündən neçə payız keçib e,
onun qoxusu hələ də çəkilmir paltarından

Hərdən ovulub gedərsən...
Burnunun ucu göynəyər tanış qoxudan ötrü
Yağış yağar, görərsən ki,
altında bir boş yer qalıb əlindəki çətirin

Hərdən boynunu üşüdər onun aldığı şərf
barmaqların əllərindən sırsıra tək sallanar.
Boş küçədə öskürər xatirələr astaca
Cədvəllərdə yazılar: “mənfi sənsiz dərəcə”

Hərdən heç nə dəyişməz...
Bir görüş yeri boyda boşluq qalar içində
Hərdən büdrəyərsən... yıxılarsan
xatirələrin yanından keçəndə...